ചേലേമ്പ്ര: അക്ഷരങ്ങൾക്കൊപ്പം ജീവിതവും പഠിപ്പിച്ച പ്രിയപ്പെട്ട അധ്യാപകർക്ക് ആദരമർപ്പിച്ച് ചേലേമ്പ്ര ഗ്രാമപഞ്ചായത്ത് മൂന്നാം വാർഡ് മെമ്പർ പി. അബ്ദുൽ റഷീദ്. അധ്യാപക ദിനത്തോടനുബന്ധിച്ചാണ് വാർഡിൽ താമസിക്കുന്ന അധ്യാപകരെ നേരിൽക്കണ്ട് അദ്ദേഹം സ്നേഹോപഹാരം കൈമാറിയത്.
”അറിവിന്റെ വെളിച്ചം പകർന്നും, അക്ഷരങ്ങൾക്കൊപ്പം ജീവിതം പഠിപ്പിച്ചും തലമുറകളെ നന്മയിലേക്ക് നയിച്ച പ്രിയപ്പെട്ട അധ്യാപകർക്ക്…” എന്ന ഹൃദ്യമായ കുറിപ്പോടെയും അധ്യാപകരുടെ ഫോട്ടോ പതിപ്പിച്ചതുമായ പ്രത്യേക ഫ്രെയിമുകളാണ് മെമ്പർ ഉപഹാരമായി നൽകിയത്.
വാർഡിലെ അധ്യാപകരായ സജാദ് ,ജുനൈദ് എം. വി , ഷഹീൽ എംവി , സബീഹ് എംവി , ബുഷറ , ഫൗസിയ വി , സുഷ ടി , സുഹറാബി , സബീല എംവി എന്നിവർക്ക് അദ്ദേഹം വീടുകളിലെത്തി നേരിട്ട് ഉപഹാരങ്ങൾ കൈമാറി. ജനപ്രതിനിധി നേരിട്ടെത്തി സ്നേഹാദരങ്ങൾ അറിയിച്ചതിന്റെ അതിയായ സന്തോഷത്തിലാണ് വാർഡിലെ അധ്യാപകർ. അധ്യാപക സമൂഹത്തോടുള്ള വാർഡ് മെമ്പറുടെ ഈ മാതൃകാപരമായ കരുതലും സ്നേഹവും നാട്ടുകാരുടെ ഇടയിലും വലിയ പ്രശംസ നേടിയിട്ടുണ്ട്.
