ചെറുവട്ടൂർ: ലഹരി ഉപയോഗത്തിനെതിരെ വിദ്യാർത്ഥികളിലും നാട്ടുകാരിലും അവബോധം വളർത്തുന്നതിന് വ്യത്യസ്തവും ഫലപ്രദവുമായ പരിപാടികൾ സംഘടിപ്പിച്ച് ചെറുവട്ടൂർ എം.ഐ.എ എം യു പി സ്കൂൾ ശ്രദ്ധേയമായി. സോഷ്യൽ സയൻസ് ക്ലബ്ബിന്റെ നേതൃത്വത്തിൽ നടന്ന ഈ ഉദ്യമങ്ങൾ ലഹരിക്കെതിരായ പോരാട്ടത്തിൽ പൊതുസമൂഹത്തിന് പുതിയ ദിശാബോധം നൽകുന്നതാണ്.
ലഹരിയുടെ ദൂഷ്യഫലങ്ങളെക്കുറിച്ച് കുട്ടികളെയും പൊതുജനങ്ങളെയും ബോധവൽക്കരിക്കുന്നതിനായി സ്കൂൾ അധികൃതർ വിവിധ പരിപാടികളാണ് ആവിഷ്കരിച്ച് നടപ്പിലാക്കിയത്. ഇതിന്റെ ഭാഗമായി ബോധവൽക്കരണ പോസ്റ്ററുകൾ തയ്യാറാക്കി പ്രദർശിപ്പിച്ചു. ലഹരിമുക്തമായ ഒരു സമൂഹം കെട്ടിപ്പടുക്കേണ്ടതിന്റെ പ്രാധാന്യം വിളിച്ചോതുന്നതായിരുന്നു ഈ പോസ്റ്ററുകൾ.
സ്കൂളിന്റെ നൂറ് മീറ്റർ പരിധിയിൽ റോഡിന് കുറുകെ ‘ലഹരിമുക്ക’ യെല്ലോ ലൈൻ വരച്ചത് വേറിട്ടൊരു കാൽവെപ്പായി. ഈ അടയാളപ്പെടുത്തൽ ലഹരി വിമുക്ത മേഖലയുടെ പ്രാധാന്യം ഓർമ്മിപ്പിക്കുകയും ലഹരി ഉപയോഗത്തിൽ നിന്ന് വിട്ടുനിൽക്കാൻ ആളുകളെ പ്രേരിപ്പിക്കുകയും ചെയ്യും.
കൂടാതെ, ലഹരി ബോധവൽക്കരണ ഗാനം, വീഡിയോ പ്രദർശനം എന്നിവയും സംഘടിപ്പിച്ചു. ലഹരിയുടെ ദൂഷ്യഫലങ്ങൾ, അത് വ്യക്തികളെയും സമൂഹത്തെയും എങ്ങനെ ബാധിക്കുന്നു എന്നതിനെക്കുറിച്ചുള്ള വ്യക്തമായ സന്ദേശങ്ങൾ ഈ പരിപാടികളിലൂടെ വിദ്യാർത്ഥികളിലേക്കും പൊതുജനങ്ങളിലേക്കും എത്തിക്കാൻ സാധിച്ചു. പ്രധാനാധ്യാപിക താജുന്നിസ ടീച്ചർ മാനേജർ കെ.എം.എ റഹ്മാൻ, സബ്ജക്ട് കൗൺസിൽ കൺവീനർ നാജിയ ടീച്ചർ, സുലൈഖ ടീച്ചർ, ജസീം മാസ്റ്റർ, മാനസ് സർ, രമണി ടീച്ചർ ,അർജുൻ സർ, അലി അബ്ദുറഹീം സർ ഇസ്ഹാഖ് സർ എന്നിവരാണ് ഈ ബോധവൽക്കരണ പരിപാടികൾക്ക് നേതൃത്വം നൽകിയത്. ലഹരിക്കെതിരെ ഒരുമിച്ച് നിൽക്കേണ്ടതിന്റെ ആവശ്യകത ഊന്നിപ്പറയുന്ന ഈ പ്രവർത്തനങ്ങൾ സമൂഹത്തിന് വലിയൊരു സന്ദേശമാണ് നൽകുന്നത്.
